Produktu ekologikoa, tokikoa eta sasoikoa izan da edizio honetako protagonista nagusia. Hain zuzen ere, asteburu osoan Noaingo Zentzumenen Parkean elikagai ekologikoen azoka egon da, eko-gune gastronomikoa, abeltzaintza erakusketa, musika eta animazioa, besteak beste. Irailaren 15etik, arratsaldez eta igande eguerdira arte milaka pertsona gerturatu dira, bai erosketak egiteko eta postu ekologikoak bisitatzeko, Geltokik kudeatzen duen gune gastronomikoan elikagai ekologikoak dastatzeko, bai antolatutako tailerretan parte hartzeko ere.
Eguraldia txarra izan bazen ere, eta batez ere igandeko egunari eragin bazion ere, jendearen joan-etorria etengabea izan da asteburu osoan zehar, hainbesteraino non, ateak itxi aurretik, postu asko bere elikagaiak agortuta edo agortzetik gertu baitzeuden. Parte hartzaileek zein antolatzaileek azokaren arrakasta nabarmendu dute, aurten zapore ona utzi baitu eta datozen edizioetan lanari ekiteko balio duelako, CPAEN/NNPEKeko lehendakari Mª José Arrondok adierazi duenez.
Azoka garrantzitsua da, ekoizten dena bertatik bertara erakutsi ahal izatea eskatzen duelako, baina baita nork eta nola ekoizten duen ere. Alderdi horiek oso garrantzitsuak dira nekazaritza ekologikoaz, jasangarritasunaz eta elikagai ekologikoen sustapenaz hitz egiten denean. Hirugarren urtez Noaingo Zentzumenen Parkean egiten den ekitaldi kontsolidatua da Nafarroako Azoka Ekologikoa, tokiko ekoizpen ekologikoa sustatzeko eta elkartzeko gune gisa. Sektore ekologikoaren ahalegina da, eta salmenta zuzenaren alde egiten du, ekoizleen eta herritarren arteko topaketaren alde.
Ostiral arratsaldean, bisita gidatu bat egin zen alderdi politikoekin, eta postu ekologikoak bisitatu ziren CPAEN/NNPEKko kontseiluarekin. Jose Mª Aierdi kontseilariaren eta Sebastian Marco Noaingo alkatearen presentzia nabarmendu zen, Noaingo Udaleko beste ordezkari batzuekin batera, eta EH Bildu, PSN eta Contigo Zurekin alderdietako ordezkarien presentzia ere egon zen. CPAEN/NNPEKeko lehendakari Mª José Arrondok, gainera, eskerrak eman dizkie azokara hurbildu diren pertsona guztiei, bai kontsumitzaileei, baita enpresa eta ekoizleei ere.
Bestalde, jarduera eta tailer guztiek bete dira, eta ehunka pertsonak parte hartu dute sendabelarren tailerrean, saskigintza tailerrean edo ekoizletik ahora dastaketetan. Azpimarratzekoa da, halaber, TxikiEkoGunea, asteburu osoan zehar txikienen topagunea izan dena puzgarriekin, haurrentzako zirkuarekin eta abarrekin.
Hurrengo hitzordua: EKOmerkatua Burlatan
Nafarroako nekazaritza ekologikoaren hurrengo hitzordua urriaren 7an izango da Burlatan. EKOmerkatua Iruñeko Autobus Geltoki Zaharreko nasetan egin ohi den arren, oraingo honetan Burlatako Udal Parkera lekualdatuko da, eta 10:00etatik 14:00etara Nafarroako ekoizpen ekologikoak beren elikagaiak erakusten ariko dira. Gainera, baratze ekologikoaren hastapenerako tailer bat antolatu da eta ‘Egin Zaitez eko’ erakusketa ere egongo da elikagai ekologiko erraldoiekin.
