2016an, CPAEN/NNPEK Nafarroako elikagai ekologikoen salmenta puntuen eta ostalaritzaren kanpaina hasi zuen, elikagai ekologikoak dituzten establezimenduak identifikatu, ikusarazi eta haien balioa nabarmentzeko. Gaur egun, Nafarroa osoan 60 puntu inguru daude sarean, eta orain, berriz ere bisitatzen ari dira, CPAEN/NNPEK ziurtagiria duten elikagai ekologiko gehiago sar ditzaten. Kanpainaren helburua elikadura birlokalizatzea da, Nafarroako dendek bezeroei kalitatezko elikagaiak, bertakoak eta iraunkorrak eskaini ahal izateko.
Nafarroako elikagai ekologiko ugari eros ditzakezun bi establezimendu partekatzen dizkizuegu:
Zangozan dago Punto EKO. 2020az geroztik, produktu ekologikoen aukera zabala eta zero kilometrokoa eskaintzen ditu, eta, gainera, tokiko eta hurbileko ekoizleen topagune eta sustapen gisa balio du, ziurtatutako produktu ekologikoekin lan egiten baitute. Elikagaiak, granelean, kosmetika eta garbitzeko produktuak eskaintzen dituzte, besteak beste. Bertan, Nafarroako elikagai ekologiko ugari aurki ditzakezu: Aroa, Lezaun eta Mendiko upategietako ardoa; Gumendi, Allo kontserbak, Bardea eta Ecovinal olioa, Aspace gaztak, Jauregia, Larrezabal Eco, Axuribeltz; Tafallako barazki ekologikoen saskiak, Ignacio Sueskunen haragi ekologikoa, Ferment Art hartzigarriak, Borda Eguillorren moxala eta Girones gatza; Panacea ogia, El Alcaraván arroza, Guneko arrautzak, Erlandere eztia, Arrasateko ogia, Iriarte Equisoainen garbantzuak, Martinelli pasta eta Manuel Anduezaren patata.
Zaraitzuko Espartzako Murkuzuria kanpinean, naturaz inguratuta eta interesgune askotatik gertu, produktu ekologikoak eta hurbilekoak dituen denda txiki bat dago. Catia eta Ana establezimenduko arduradunek tokiko, sasoiko eta ekoizpen ekologikoko produktuetara hurbiltzeko apustua egin dute, bai dendan, bai taberna-jatetxean, ingurumenarekiko konpromiso hori transmititzen saiatuz. Dendan Navarrico eta Ekoloko kontserbak, Gari Garbiko haragia, Azpea eta Aroa upategietako ardoa, Martinelli pasta, Girones gatza, Manuel Anduezaren patata, Joseneako infusioak eta Arguinarizen irina aurki ditzakezu.
