Mirian Otxotorena CPAEN/NNPEKko lehendakariak parte hartru du kanpainaren aurkezpenean eta balioan jarri ditu Errigorak azken urteetan ekoizpen ekologikoa sustatzeko emandako pausuak. Esan duenez, CPAEN/NNPEK bidelagun izan du Errigorak hainbat produkturen kasuan ekoizle ekologikoak topatzeko eta elaboratzaileekin harremanetan jartzeko. Nekazari eta transformatzaileen artean eraikitako zubiak funtsezkoak direla azpimarratu du, izan ere, gehiegitan elkarri bizkarra emanda aritu dira eta elkar-ulertze hori ezinbestekoa da tokiko-elikadura sistemak garatzeko. Bertan ekoizten dena bertan kontsumitzeko bideak erraztea da, hain zuzen, Errigoraren balio nagusietakoa.
Kiko Fernandezek (besteak beste, kanpaina honetako eskaintzaren parte den Bardea olioaren ekoizlea, biata txitxirio ekoizlea eta Hazialdeko elkarteko kidea ere) azpimarratu du ekoizpenean pausu berriak emateko bultzada handia eskaintzen duela Errigora bezalako ekimen batean biltzen den eskaerak. Izan ere, ekoizpen berriei ekiteko edo lur eremu berriak landatzeko apustua egitean ekoizleek izaten duten ziurgabetasuna arintzen laguntzen du, ekoitzitakoaren salmenta eta banaketa izaten baita sarritan apustu berriei muzin egiteko galga nagusia.
Azkenik, produktu ekologikoak kontsumitzeko deia egin die Otxotorenak herritarrei, agroekologiak elikadura-burujabetzara bidean eskaintzen dizkigun onurak azpimarratuz, bai ingurumenaren ikuspegitik, baina baita ikuspuntu sozialetik ere.
Ekoizle ekologikoak
Kanpaina honetan, Nafarroako 10 ekoizleren 15 erreferentzia ekologikok parte hartzen dute, euskaraz etiketatuta. Enara eta Bardea olioak; El Escolar, La Churta, Enara, Ebrón eta Pedro Luis kontserbak; El Alcaraván arroza; Martinelli pasta eta Hazialdeko elkarteko lekaleak.