Patxi Amillanok gazta ekologikoa ekoizten du Larrezabal Eco markaren pean. Kontsumitzaileek lan hori plater batean edo ogi zati baten gainean jarritako Idiazabal gazta-ebaki batean laburbilduta ikusten dute, baina atzean lan handia eta arduradunen konpromisoa ditu. Beren artaldeak kudeatzen dituzte, larreak zaintzen dituzte eta beren ardi latxek jaten dituzten elikagaiak ekoizten dituzte; ziklo oso hori belardietatik ardietara doa, eta esnetik gaztara. Ekonomia zirkularra eta zero kilometroa egoera puruan.
Konta iezaguzu zure ibilbide ekologikoa. Zer ekoizten duzu, non, nola?
Larrezabal Eco gazta ekologikoa ekoizten duen familia enpresa bat gara, CPAEN/NNPEKek ziurtatutako lehen Idiazabal gazta ekologikoa. 1989an ardi latxak hazten hastea erabaki genuen, gutxi batzuk, eta hemen betidanik egiten zen bezala hazi nahi izan genituen, ikusten genuelako gure zonaldeak – Sakanak – baliabide eta larre nahikoak zituela elikatzeko, pentsuz edo beste elikagai batzuez kanpoko laguntzarik erabili behar izan gabe. Gure larreak ondo kudeatuz gero, elikadura bermatuta genuen . Urte batzuetan ardiak hazten joan ginen, gazta ekoizten hasi eta gaztandegi bat sortzeko aukera ikusi genuen arte. Orduan, ekologikoan ziurtatu genuen; nahiz eta beti lan horretan aritu ginen, gaztaren ekoizpenarekin ikusi genuen beharrezkoa zela ekologikoan ziurtatzea CPAEN/NNPEKekin, horrek kontsumitzaileei gauzak ondo egiten direla bermatzen dielako.
Beti egin izan dena egiten hasi ginen, gurasoengandik eta aitona-amonengandik ikusitakoa, baina gaztandegiarekin hasi zen alderik zailena: merkaturatzearekin zer egiten genuen erabakitzea.
Zergatik zatoz EKOmerkatura?
Merkaturatze-kanal laburren alde egitea erabaki dugu. Orain asko hitz egiten da 0. km-ri buruz, eta horixe izan zen gure apustua hasiera-hasieratik: ahal den neurrian zuzenean kontsumitzaileari saltzea, horrek eraman gaitu Altsasuko edo Iruñeko EKOmerkatua bezalako merkatuetara. Gure ustez, gertuko salmenta batean, norbait Ekomerkatura hurbiltzen denean, gurekin harremanetan jar daiteke, kontsumituko dituzten elikagaiak nork ekoizten dituen jakin dezake, erosten duzun gauza bakoitza nondik datorren jakin dezake eta hori garrantzitsua da. Ulertzen dugu Iruñea bezalako hiri batean elikagai ekologikoak eta gertukoak kontsumitzeko gogoa dagoela eta guk horren aldeko apustua egiten dugu EKOmerkatuan.
Abiatze zaila izan den arren, pandemia betean, hori aukeratu dugu eta ez dugu huts egingo.
Zergatik kontsumitu produktu ekologikoak?
Ekologiaren aldeko apustua egiten dugu, gure gazta kontsumitzera ez ezik, ziurtatutako elikagai ekologikoetara pasatzera ere animatzen ditugu pertsonak. Gaur egun inork ezin du ukatu elikagai ekologikoak osasungarriagoak direla; baliteke elikagai arrunt batengatik baino pixka bat gehiago ordaintzea, baina badakizu produktu natural bat eramaten duzula etxera, kimikarik eta botikarik gabe, eta ahaztutako zaporeak berreskuratzen dituela, galdu egin baitziren. Gure kasuan prozesu guztia ekologikoa da eta gatzagia ere naturala da eta guk geuk lortzen dugu, horregatik gure gaztak hain zapore berezia du. Gainera, ziurtatuta daudenez, hori horrela dela bermatzen du .
Av. Serapio Huici, 22 - 1ª Planta. Edificio de Peritos 31610 Villava (Navarra) | Tel-Fax: 948 17 83 32-948 25 66 42 | cpaen@cpaen.org
