«Nafarroako Elikadura-burujabetzaren erradiografia: hautatutako adierazleen analisia» dokumentua aurkeztu da. Dokumentu horrek Nafarroako nekazaritzako elikagaien sistemaren egoerari buruzko hurbilketa bat egiten du, eta zenbait adierazle aztertzen ditu, abiapuntuko egoera zein den jakiteko eta gure lurralde hurbilenean elikadura burujabetzan oinarritutako eredu baterantz urratsak eman ahal izateko.
Adierazleetan, honako hauek aztertu dira: nekazaritza-azalera, higadura, nekazaritzaren/laboreen dibertsifikazioa, laboreen erabilera, arto transgenikoaren azalera, autokontsumorako baratzeak, nekazaritza-dibertsitatea/tokiko barietateak, uraren erabilera nekazaritzan, ongarri kimikoen kontsumoa, pestiziden kontsumoa, ganadua, nekazaritza-sektoreko bitarteko kontsumoak, ekoizleak, nekazaritza-ustiategiak, nazioarteko komerzializazioa, tokiko elikagaien ekoizpena eta ekoizpen ekologikoa.
Ondorioen artean, Nafarroan azken 20 urteetan nekazaritza-lurrak gutxitu egin direla, lurzoru emankorra galtzen jarraitzen dela eta zerealak eta bazkek landatutako lur guztiaren % 75 hartzen dutela nabarmentzen da. Nekazaritza-ustiategiak ere desagertu egin dira, eta 15 urtean erdira murriztu dira. Gainera, Nafarroan nagusi den abeltzaintza eredu intesiboa da, etengabe ukuiluratuta dagoen aziendarekin.
Emaitza positibo gisa, erradiografian adierazi dute Nafarroako azalera ekologikoa eta ekologikoan inskribatutako ekoizle-kopurua handitzen ari dela. "Hori ez dator bat foru-erkidegoan ustiategiak oro har desagertzearekin, eta pizgarria da nekazaritza-ekoizpenaren etorkizunerako; bereziki, tokiko merkataritzaren eta kontsumoaren beharrak asetzeko planifikatzen bada eta ekitate-irizpideekin egiten bada", azaldu dute.
Gainera, dokumentu horrekin batera, manifestu bat dago, hainbat eremutako kolektiboek egina, administrazio publiko arduratsuetan eragina izan dezan, eta atxikimenduetarako irekita egon dadin.
