Iruñeko Udaleko Etxeko Arreta Zerbitzuaren plegu berriaren menua prestatzeko baldintzek irizpide osasungarri eta iraunkorrak hartzen dituzte kontuan. Alde batetik, barazkien % 50ek freskoak, sasoikoak, hurbilekoak eta ekologikoak izan behar dute; gainera, zerbitzatzen diren dilista eta txitxirioen erdiak ere ekologikoak eta hurbilekoak izan behar dute. Bestalde, arrozaren eta oloaren % 50 ekologikoa eta hurbilekoa izango da. Haragiari dagokionez, hilean bitan txahal ekologikoaren eta hurbilekoaren haragia zerbitzatu beharko da. Bestalde, jogurtaren % 50 abeltzaintza ekologikotik etorriko da. Fruten % 10ek freskoak, hurbilekoak eta sasoikoak izan behar dute.
Gainera, agiriak beste 100 puntu puntuagarri hartzen ditu kontuan, izaera jasangarriko irizpideekin. Besteak beste, elikagaien izaera jasangarriaz gain, kontuan hartu dira garraiorako ibilgailuen flota, kontratatutako energiaren jatorria edo ontzi biodegradagarrien erabilera.
Kontratuaren balioa 2.910.959,10 eurokoa da, eta aurtengo irailean jarriko da zerbitzuan. Guztira, 2022ko abenduaren 31ra arte 156.000 bazkari eta 43.333 afari izango dira, 422 erabiltzaileri.
CPAEN/NNPEKek oso positibotzat jo ditu etxez etxeko laguntza-zerbitzuaren baldintza-agirietako baldintza berriak, Iruñeko udal-haur-eskoletako nutrizionistekin batera lan egin baitu. Adineko pertsonak, mendekotasuna dutenak eta behar bereziak dituztenak dira etxez etxeko laguntza-zerbitzuaren profil orokorra, eta, beraz, dieta jasangarriak eta osasungarriak sustatzeak berebiziko garrantzia du, Milango Itunak jasotzen duen bezala. Itun hori Iruñeko Udalak sinatu du.
