"Janariaren bidez iraultza handia egin daiteke"

Nishime

Almudena Montero y Nerea Zorokiain

"Janariaren bidez iraultza handia egin daiteke"

Almudena Montero eta Nerea Zorokiain Nishimeko sustatzaileak dira, elikadura osasungarria zabaltzen eta sustatzen duen Makrobiotika Eskola. Online zein aurrez aurreko prestakuntzarekin gakoak erakusten dituzte elikadura ohitura aldaketa iraunkorra egiteko, osasuna zaindu edo berreskuratzeko, elikadura nutritiboa izateko, profesionalki prestatzeko eta fermentuak prestatzeko. Aurten, gainera, hainbat kontserba ikastaro emango dituzte NNPEKekin batera.

Zer da Nishime?

Sukaldaritza eskola osasuntsua da nishime. Makrobiotikaren filosofian oinarritzen da, baina askoz  gehiago egiten dugu: hartzidura tailerrak, gosari osasungarrien ikastaroak.... Makrobiotikari buruzko prestakuntza ere badugu, aurrez aurrekoa zein online. Azken finean, elikadura osasungarriaren dibulgazioan, prestakuntzan eta hedapenean aritzen gara. Guk uste dugu janariaren bidez iraultza handia egin daitekeela eta pertsonengan aldaketa handiak egin daitezkeela. Zer jaten duzun, nola prestatzen duzun eta elikagaiak zer kalitatetakoak diren jabetuz, besterik gabe. Eraldaketa pertsonal moduko bat da. Zuk yoga egin dezakezu edo ez,  baina jatea eguneroko kontua da. Beraz, bide horretan nahi duzun guztia sakondu dezakezu. Ez da bakarrik elikagaien  nutrienteei erreparatzen diegula; kontuan izan behar da, halaber, nire elikagai-erabakiek ondorio bat dutela ingurumenean.

Noiz jarri zineten martxan Iruñean?

Duela zortzi urte produktu ekologikoen denda bat genuen, Ecomer izenekoa. Hor hasi zen dena. Dendan sukaldaritza tailer txikiak egiten genituen, adituak ikastaroak ematera gonbidatzen genituen eta noizean behin guk tailerren bat edo beste egin genuen. Tailerrek espero genuena baino lan bolumen handiagoa sortzen zutela jabetu ginen eta pixkanaka-pixkanaka denda sukalde eskola bihurtuz joan zen. Azkenean, denda itxi eta Nishime Institutu Makrobiotikoa irekitzea erabaki genuen.

Elikadurak berak eraman zaituzte honetara?

Hala da. Egia esan, Nishime ez da planifikatua izan. Bestalde, oso gaztetatik begetariano egin ginen eta elikadura eta kontzientzia ekologikoa beti izan dugu presente. Badakigu garrantzitsua dela natura eta geure burua zaintzea. Gainera, makrobiotikan oinarritzeaz gain, gure betaurrekoekin ikusten dugu mundua. Ikuskera bat da, alde espiritual bat dago, mundua ulertzeko modu bat... Egia da makrobiotika oso zurruna izan daitekeela, eta guk begirada zabaltzen dugu. Malgutasun handia dago eskolan, eta helburua da pertsona bakoitzak behar duena esploratzea.

Zeintzuk dira elikadura osasungarri baten gako nagusiak?

Zure biologian oinarritutako elikadura izatea da gakoa. Gu gizakiak gara, bete beharreko premia batzuk ditugu eta gutako bakoitza izaki bakarrak gara. Hori ulertzeak askatasuna ematen dizu aukeratu ahal izateko. Urtaroak aldatu egiten dira, energia fluxua aldatu egiten da eta baratzean aurkitzen ditugun barazkiak ere aldatzen dira. Orduan, denborarekin eraldatzen joan behar dugu. Eta gakoa pertsona bakoitzak bere burua entzutea da. Gainera, kontzientzia hartzea garrantzitsua da. Norberarena, eta bakoitzak egiten dituen ekintzena. Barrutik entzuteko bide bat da.

Gero eta interes handiagoa dago elikadura aldatzeko?

Kontzientzia handiagoa dago, eta, aldi berean, nahasmen gehiago, informazio asko dagoelako. Pertsonak nahasmen handiz hurbiltzen dira eskolara. Normala da, bakoitzak gauza bat esaten dugulako elikadurari dagokionez, denerako azterlanak daudelako, ordaintzen dituenaren arabera. Guk esaten duguna da: 'Entzun, begiratu zein den zure biologia, entzun naturari eta begiratu ingurura'. Gako magikoa izan nahi dugu, errezeta, baina hori ez da existitzen. Gainera, pentsatzen dugu gauza berriak egin behar ditugula elikadura osasuntsu bat izateko, baina lehen egiten zena egitea da, gure amonek egiten zutena. Lurrak ematen diguna jatea da, itzulerako bide bat.

Zer-nolako garrantzia du zuentzat elikadura ekologikoak?

Funtsezkoa da guretzat. Beharrezkoa da elikadura osasuntsua kalitatezkoa izatea, eta horretarako ekologikoa izan behar du. Eta ez dugu sukaldean aritzeaz bakarrik hitz egiten, unibertsoaren parte zarela ulertzen duzunean, ezin duzu naturari kimikarik bota. Ez du zentzurik. Etxean ez da ekologikoa ez den ezer sartzen. Papaia oso ona da nutrizioari dagokionez, baina ez duzu papaia baten beharrik, Iruñean gaudelako. Naturak une bakoitzean behar duzuna ematen dizu zehazki. Zure inguruan gaztainak, kalabazak, tipulak eta azenarioak hazten badira, hori da jan behar duzuna. Gure begirada hori da, baina askotan gertatzen da elikadura osasungarriarekin hasten diren pertsonek ekologikoa den edo ez den etiketa bakarrik irakurtzen dutela. Orain supermerkatu bakoitzak bere eko marka du, eta ekologikoaren kontzeptua aldatzen ari da. Horregatik, garrantzitsua da hurbileko ekoizleengana itzultzea.

Ohiturak aldatzen hasteko orduan, zer da pertsonei gehien kostatzen zaiena?

Batez ere, kontsumitzeko ohiturak aldatzea. Hau da, errezeta dute, baina leku bat bilatu behar dute erosteko, eta denbora eskaini horretarako eta prestatzeko. Hemen, eskolan, mito guztiak desmuntatzen saiatzen gara, eta tresnak ematen diegu, nahi izanez gero, buelta eman diezaioten. Iruñean erraza da erostea, baina inplikazioa beharrezkoa da.

Aurten, kontserba ikastaro batzuk emango dituzue berriro NNPEKen. Nolakoak izango dira?

Barazkien kontserba tradizionalez eta azukrerik gabeko marmeladez gain, hartzitzen ere ikasiko dugu ikastaroan. Nafarroan jende askok baratza dauka, eta beti modu berean gorde ohi da. Hartzitzen irakasten badugu, oraindik gehiago batzen ari gara kontserbari, eta elikagaiak gordetzeko modu segurua da. Hartziduraren bidez, elikagaiak eraldatzen dituzten mikroorganismoen komunitate bat sortzen ari gara.